Vimianzo. Do mar á terra.

Potaxe castrexa

[RECEITA CASTREXA]
Ingredientes:

• 100 gr de cordeiro
• 80 gr de tenreira
• 200 gr de xarda
• 100 gr de maragota
• 100 gr de mexillóns
• 1 presa de verzas
• 100 gr de trigo
• Manteiga de porco
• 2 culleradas de mel
• Sal, romeu e tomiño

ELABORACIÓN:
Poñer a cocer o cordeiro e a tenreira en auga coa graxa de porco. Cando a carne estea cocida, engadir as verzas picadas. Coa verdura tenra, meter na auga fervendo a xarda e a maragota durante 5 minutos. Despois, engadir os mexillóns, as ameixas e o trigo e deixar cocer un par de minutos. Para rematar, botar o mel, o romeu e o tomiño. Xa está listo para servir.

Filloa rechea de compota de pera

[RECEITA CASTREXA]
Ingredientes:

• 2 ovos
• 2 peras
• 4 culleradas de fariña
• Sal
• Auga    

ELABORACIÓN:
Facer a masa mesturando os ovos coa fariña e a auga. Despois facer a filloa nunha tixola untada en graxa de porco. Para a compota, cocer a pera en auga ata que adquira a aparencia de marmelada. A continuación engadir o mel. Para rematar encher a filloa coa compota de pera e enrolala. Decorar con mel.

Ensalada da Marquesa

[RECEITA MEDIEVAL]
Ingredientes:

• Leituga
• Escarola
• Cebola
• Achicoria
• Cenoria
• Uvas
• Alfabaca
• Noces
• Vinagre
• Sal
• Mel

ELABORACIÓN:
Colocar nun prato os ingredientes que compoñen a ensalada, ben repartidos para que se vexa a gran mestura de cores. Aliñar co sal e coa mestura de vinagre e mel. Servir.

Galiña medieval

[RECEITA MEDIEVAL]
Ingredientes:

• 2 ou 3 anacos de galiña
• 1 porro
• 4 cebolas
• 3 cenorias
• 1 presa de verzas
• Coandro
• Alfabaca
• 1 presa de améndoas
• 1 presa de noces
• 1 ovo
• Sal

ELABORACIÓN:
Cocer a galiña durante unhas dúas horas para que estea ben feita. Cando empece a estar tenra engadir as cebolas e as cenorias enteiras e o porro picado en anacos grandes. Un pouco máis tarde botar as verzas enteiras.

Facer unha salsa co ovo e a améndoa esmagada. Unha vez empratado e aliñado coa salsa, decorar coa alfabaca, o coandro e as noces.

Biscoito de salvado e noces

[RECEITA MEDIEVAL]
Ingredientes:

• 200 gr de salvado
• 2 ovos
• 150 gr de noces picadas
• 2 culleradas de mel

ELABORACIÓN:
Bater os ingredientes todos xuntos. Meter nun molde e deixar no forno durante 15 minutos. Servir frío e acompañado de leite de améndoa.